Witajće k nam

Lubi pacienća, přiwuzni a wopytowarjo,

witamy Was wutrobnje do Hornjołužiskich klinikow tzwr z chorownjomaj w Budyšinje a Biskopicach. Jako zastaraćel z wěstym ćežišćowym wusměrjenjom a chorownja za akutne pady mamy wobšěrny mediciniski spektrum a zdobom specializowany medicinski know-how. Smy komunalne předewzaće Budyskeho wokrjesa. Z nazhonjenjom, dowěru, fachowej kompetencu a starosćiwosću zastaramy něhdźe 75.000 pacientow wob lěto. Za to mamy dohromady 505 łožow, z toho 390 w Budyšinje a 115 w Biskopicach.

Naše certifikowane centry, kaž na přikład interdisciplinarny centrum za žiły a kompetencny centrum za chirurgisku koloproktologiju, labor za přepytowanje spara, centrum za endoprotetiku abo labor za přepytowanje wutroby kaž tež centrum žónskich a dźěćacych lěkarjow garantuja profesionalne zastaranje pacientow na wysokim niwowje. Z dalšim specializowanjom kaž na př. centrumom za hrudź, geriatriju, inwaziwnej kardiologiju abo tež OP-robotiku chcemy našu medicinisku kompetencu w přichodźe wutwarić. W centralnej přijimarni za nuzne pady zastaruja so akutne pady 365 dnjow wob lěto, 24/7. Jeničce w chorownjomaj w Budyšinje a Biskopicach je něhdźe 1.200 sobudźěłaćerjow přistajenych.

Hornjołužiske kliniki tzwr je zdobom zwjazk předewzaćelow z dalšimi posłužbarjemi na polu strowotnistwa a serwisow. Zarjadnišća stacionarneho hladanja, ambulantneho hladanja chorych, posłužbow primarneje a sekundarneje prewencije, medicinske centry kaž tež serwisowe a posłužbowe poskitki wudospołnjeja cyłotne zastaranje. Cyłkownje je to 2.300 přistajenych, kotřiž w tutych wobłukach skutkuja.

Jako zwjazk předewzaćelow poskićamy wjele móžnosćow, namakać swójski powołanski puć. Zajimawe a zamołwitosće połne nadawki čakaja w hladanju chorych a starych ludźi, w hladanju schorjenych dźěći abo ćěšenkow, ale tež w funkcionalnych wobłukach kaž radiologiji abo laborach. Za technisce zajimowanych skića so mnohe móžnosće we wobłuku IT, w medicinisko-techniskim wobłuku kaž domjacej technice abo mediciniskej technice. Smy praktiski partner Budyskeje Statneje studijneje akademije, hdyž dźe wo dualny studij. Wukubłujemy nimo toho na wšelakich powołanskich polach z wuskim poćahom k praksy.  Wot lěta 2002  su Hornjołužiske kliniki tzwr akademiska wukubłanska klinika Drježdźanskeje Techniskeje uniwersity a skića přichodnym lěkarja wobšěrne wukubłanske a dalekubłanske móžnosće.

Hdyž přińdźeće jako pacientka abo pacient do chorownje, podaće so jako prěnje k informaciji. Tu postrowja Was naš serwisowy personal a pokazuje Wam puć k přiwzaću pacientow, hdźež so wo Was, pak ambulantnje abo stacionarnje staraja. Prócujemy so wo to, zo njenastanu rěčne barjery.  Naš personal, hač lěkarjo abo hladanski personal reprezentuja šěroki spektrum najwšelakorišich narodnosćow. Nimo toho wobsteji móžnosć, wužiwać poskićene posłužby tołmačenja. Dalši přewod za čas přebywanja w chorowni, hač přez dušepastyrstwo chorownje, čestnohamtsku wopytowansku słužbu abo přez psychologisku a psycho- onkologisku konsiliarnu słužbu, su móžne.

Přejemy Wam přijomne přebywanje a bórzomne wustrowjenje.